Us em töife dunkle Wald tönt ganz fyn es Glöggli-Lüte. Was isch äch das? Zwüsche de Böim cha me e Schyn gseh. Wär chunnt ächt da?

Ds Glöggli tönt gäng wie heller und ou das Liecht chunnt necher. Es isch e Latärne vo lüchtet. Und würklech, us em Wald chunnt der Samichlous mit em Schmutzli und si hei zwöi Eseli derby.

Hey, wie isch das e Fröid, wo die zwe Manne bim Waldhuus z‘ Leuzige zum Chlousehöck vor GMMS zueche chöme. Ganz huufe Lüt, 36 Erwachsni und 12 Ching warte uf dä aut Ma mit sym rote Umhang und sym wysse Bart. Woby s jüngschte Ching mit 3 Monet no nid viu dervo hett wölle wüsse.

D Ufregig vo de Ching isch gross, wo si em Samichlous söue es Värsli verzelle. Aber die Ufgab absolviere si mit Bravour und die Erwachsne tüe ganz toll apploudiere.

Aber ou die Grosse müesse chly öppis ghöre, vo ihrne Missgschick, wo im vergangene Jahr passiert si. Und der eint oder der anger hett grad e chly roti Ohre übercho ab däm, wo der Samichlous hett verzellt. Aber ou lache hett me chönne. Ab däm länge Verzelle vor Samichlous-Gschicht, wo’s drum gange isch, dass der Samichlous truurig isch gsy, dass niemer vo ihm hett öppis welle wüsse, isch es doch em Esu Amadeo längwilig worde. Är hett sini Nase grad i gross Sack vom Schmutzli gstosse und es Seckli, gfüllt mit Nüssli und angerem feine Züg, agfange schnouse. Dr Schmutzli hett das schnäu gmerkt und fei e chly müesse kämpfe, bis dass der Amadeo si Schatz wieder hett häre ghä. Isch das es Glächter gsy.

Nachdäm dr Samichlous aune Awäsende e schöni Wiehnachte und aues Guete für’s nächschte Jahr gwünscht het, hett är und dr Schmutzli zäme mit de Eseli Myriam und Amadeo no für Föteli mit de Ching posiert. Druuf abe sy si wieder im Wald verschwunde.

Die Grosse und die Chlyne si de is Waldhuus ine und hei sech’s a de Tische gmüetlech gmacht. Dr Samichlous, wo haut e chly e gwungerige isch, hett de no dürs Fäischter ine gluegt, zum wüsse, was es eigentlech Znacht git. Aber vor luuter feine Sache, hei die Lüt dinne, das gar nid gmerkt.

Nach emne grosse Salatbuffet, serviert d‘ Chuchicrew es feins Partyfilet mit Nüdeli, Ärbsli und Pommes-Frites, wo der Präsident Hansruedi Affolter kochet hett. Em Samichlous isch grad ds Wasser im Muul zäme glüffe.

Und zum Schluss hetts no es riese Dessärtbuffet gä und feine Caffe oder Tee derzue. Bsungers das GMMS-Caffe hett guet usgseh.

Dusse isch es fescht dunkel gsy und Zyt ou scho vorgrückt, bis die Letschte das Waldhuus hei verlah.

Der Samichlous hett scho gseh, wie die flyssige Häufer bis am Schluss aues hei ufgruumet, abgwäsche und schön putzt hei. Merci viu Mau, öich aune!

Ig fröie mi scho ufs nächschte Jahr, wenn ig wieder zu Öich darf cho.

 

Autor: Samichlous

 

• 
• 
• 
• 
• 
• 
• 
• 
• 
• 
•